ഇറാനുമായുള്ള യുദ്ധത്തിൽ അമേരിക്കയ്ക്ക് വൻ ആയുധനഷ്ടം; 7 മാസം കൊണ്ട് തീർന്നത് 19 വർഷത്തെ പേട്രിയറ്റ് മിസൈൽ ശേഖരം

ഇറാനുമായുള്ള യുദ്ധത്തിൽ അമേരിക്കയ്ക്ക് വൻ ആയുധനഷ്ടം; 7 മാസം കൊണ്ട് തീർന്നത് 19 വർഷത്തെ പേട്രിയറ്റ് മിസൈൽ ശേഖരം

ഇറാനുമായി കഴിഞ്ഞ 7 മാസമായി തുടരുന്ന യുദ്ധത്തിൽ അമേരിക്കയ്ക്ക് സംഭവിച്ചിട്ടുള്ളത് സമാനതകളില്ലാത്ത ആയുധനഷ്ടമെന്ന് റിപ്പോർട്ട്. ഈ ചെറിയ കാലയളവിനുള്ളിൽ അമേരിക്കൻ സൈന്യം ഉപയോഗിച്ച് തീർത്തിരിക്കുന്നത് തങ്ങളുടെ കഴിഞ്ഞ 19 വർഷത്തെ പേട്രിയറ്റ് (Patriot) മിസൈൽ ശേഖരമാണെന്ന ഞെട്ടിക്കുന്ന വിവരമാണ് ഇപ്പോൾ പുറത്തുവന്നിരിക്കുന്നത്.

ഇറാന്റെ മിസൈൽ, ഡ്രോൺ ആക്രമണങ്ങളെ ചെറുക്കാൻ അമേരിക്ക പ്രതീക്ഷിച്ചതിലും വലിയ വില നൽകേണ്ടി വന്നുവെന്നാണ് ഇത് വ്യക്തമാക്കുന്നത്.

ഒരു ശത്രുരാജ്യത്തിന് മുന്നിൽ ലോകത്തെ ഏറ്റവും വലിയ സൈനിക ശക്തിയായ അമേരിക്കയ്ക്ക് തങ്ങളുടെ ആയുധപ്പുര ഇത്രവേഗം കാലിയാക്കേണ്ടി വന്നത് പെന്റഗണിന് വലിയ തലവേദനയായി മാറിയിരിക്കുകയാണ്.

വിവിധ റിപ്പോർട്ടുകൾ പ്രകാരം, ഇറാനുമായുള്ള യുദ്ധത്തിൽ ഏകദേശം 1,800 പേട്രിയറ്റ് ഇന്റർസെപ്റ്റർ മിസൈലുകളാണ് അമേരിക്കൻ സൈന്യം വിക്ഷേപിച്ചിട്ടുള്ളത്.

പ്രമുഖ ഗവേഷണ സ്ഥാപനമായ സെന്റർ ഫോർ സ്ട്രാറ്റജിക് ആൻഡ് ഇന്റർനാഷണൽ സ്റ്റഡീസിന്റെ (CSIS) കണക്കുകൾ പ്രകാരം 2026-ന്റെ തുടക്കത്തിൽ അമേരിക്കയുടെ പക്കൽ ആകെയുണ്ടായിരുന്നത് ഏകദേശം 2,300 പേട്രിയറ്റ് ഇന്റർസെപ്റ്ററുകൾ മാത്രമാണ്.

ഇതിൽ 61 ശതമാനവും ഇറാന്റെ വ്യോമാക്രമണങ്ങളെ പ്രതിരോധിക്കുന്നതിനായി അമേരിക്കയ്ക്ക് ഉപയോഗിക്കേണ്ടി വന്നു.

ഇതിനുപുറമെ തങ്ങളുടെ അത്യാധുനിക വ്യോമപ്രതിരോധ സംവിധാനമായ താഡ് (THAAD) മിസൈലുകളുടെ 82 ശതമാനവും ഈ പോരാട്ടത്തിൽ അമേരിക്ക ഉപയോഗിച്ചു തീർത്തിട്ടുണ്ട്. ഇസ്രായേലിനും യുക്രെയ്നും നൽകിയ വലിയ തോതിലുള്ള ആയുധ സഹായങ്ങൾക്ക് പിന്നാലെ ഇറാനുമായും യുദ്ധം ചെയ്യേണ്ടി വന്നത് അമേരിക്കൻ ആയുധശേഖരത്തിൽ വലിയ പ്രതിസന്ധിയാണ് സൃഷ്ടിച്ചിട്ടുള്ളത്.

അമേരിക്കൻ സൈന്യം ഇത്തരമൊരു ആയുധക്ഷാമം നേരിടാൻ സാധ്യതയുണ്ടെന്ന് മുൻ ആർമി ചീഫ് ഓഫ് സ്റ്റാഫ് ജനറൽ റാൻഡി ജോർജ് നേരത്തെ തന്നെ മുന്നറിയിപ്പ് നൽകിയിരുന്നു.

2030 വരെ താഡ്, പേട്രിയറ്റ് മിസൈലുകളുടെ കാര്യത്തിൽ അമേരിക്കയ്ക്ക് തന്ത്രപരമായ ദൗർലഭ്യം നേരിടേണ്ടി വരുമെന്ന് അദ്ദേഹം അമേരിക്കൻ ഭരണകൂടത്തെ അറിയിച്ചിരുന്നു.

എന്നാൽ ഈ മുന്നറിയിപ്പുകൾ അവഗണിച്ച ഭരണകൂടം, ജനറൽ റാൻഡി ജോർജിനെ നിർബന്ധിതമായി വിരമിക്കാൻ പ്രേരിപ്പിക്കുകയായിരുന്നു.